音樂人周啟生月前涉嫌虐兒後搞到一身蟻，殊不知一波未平一波又起，他昨日在大氣電波中樂壇判官上身，四出辣火頭，除了直指樂壇正處於癌症末期外，更發表「踩神論」，力數陳奕迅（Eason）「五宗罪」–聲線麻麻、Hit歌難聽、賣碟銷量差、冇交學費及未有回饋社會。不但止歌神冇面畀，一眾後輩亦走唔甩被逐個鬧，張敬軒及鄧紫棋（G.E.M.）同樣被指唔掂。填詞人黃偉文則反寸周啟生品味「與別不同」。
周啟生一向敢言，今次又辣起火頭，狂踩後輩。
周啟生在六月涉嫌獨留13歲兒子在家中，終被鄰居報警被捕，雖然家有麻煩事，昨日他在電台節目仍發揮敢言作風，繼作家李純恩撰文狠評樂壇已死，得罪不少填詞人及歌手後，無懼步後塵的周啟生透過大氣電波又一「惹火呈獻」，他說：「呢幾年真係所有歌都係由三幾個音樂人做晒，唔好搵啲連五線譜都唔識嘅人拎全年總監、作曲獎。」他又將樂壇比喻為「末期癌症的阿叔」：「依家吊緊鹽水，冇理由有病都話佢健康，我都係真心想幫樂壇。」
埋怨冇交學費
而當主持人提到現今樂壇由陳奕迅領導時，此話似乎觸動了周啟生的神經，並火力全開力數Eason「五宗罪」：「聽得出佢唱歌用心，不過佢聲線麻麻，唔係最好嘅聲音，論聲線都係張學友好啲。我鍾意佢嘅歌已經係十幾年前，《碌卡》都幾衰吓，唔好聽，冇創意！以前樂壇閒閒哋都賣幾萬隻碟，依家Eason都賣唔到幾萬隻啦。成日叫我做周師傅，但一毫子都冇畀過我，都要交學費o架。」
黃偉文與Eric Kwok（中）都出言力撐陳奕迅。
周啟生（左）與陳奕迅早年曾同台演出。
最後一宗罪則是指Eason成名後未有回饋社會，周啟生說：「佢都搵夠啦，做啲有誠意嘅嘢幫吓社會，例如搞免費騷幫老人家籌款，同埋要培訓新一代音樂人，唔想死嗰日我都仲係神童。」之後連一眾後輩也遭殃，周啟生謂：「G.E.M.作為音樂人都唔好講政治，畀人封殺就死。而軒仔（張敬軒）第一隻碟未成功前都有奮鬥、有感情，但好快就冇晒火花。」事後，周啟生接受電話訪問時稱不擔心激嬲Eason，皆因全是真心話。
Eric挺Eason
「踩神論」一出，引起樂壇各方反擊，正在放假的主角Eason一於少理，在WhatsApp回覆說：「請讓我有機會享受一吓放假悠閒的空間，多謝。」
而Eason老婆徐濠縈則封口拒回應。不過，身為《碌卡》作曲人之一的Eric Kwok則反擊周啟生說：「佢有佢品味，我尊重佢，可能佢個人唔夠重口味。我唔會嬲，同埋我覺得Eason絕對有回饋社會。」至於填詞人黃偉文亦句句寸爆說：「能容納不同的聲音才是文明進步的社會，難得有個人的品味和幾百萬香港人、十幾億全球華人那麼不同，我們應該好好保護周啟生才是。」
周啟生控陳奕迅5宗罪：
1.聲線麻麻
2.《碌卡》難聽
3.唱片銷量差
4.冇交學費
5.冇回饋社會
周啟生Profile
年齡：52歲
背景：粵語片甘草演員周吉之子，歌手周永恒的叔叔，姐姐為歌手周小君，名副其實是演藝世家。
入行事迹：70年代開始為多位歌手編曲及監製唱片，其後更以歌手身份進軍樂壇，他亦是顧嘉煇的徒弟。
威水史：擅長迷幻音樂，著名作品包括《淺草妖姬》、《長得很》及《天長地久》等。
from:
http://orientaldaily.on.c ... /00282_001.html
