無綫新劇《巨輪》上個禮拜三（九月十八日）拉隊去長沙灣一間小學做宣傳，事緣兩位男主角陳展鵬同蕭正楠响呢度讀過書，當日專登著條工人裙扮天真嘅鍾嘉欣就比兩個舊校友更受歡迎，學生老師輪住合照簽名。
有人話嘉欣BB有機會憑《巨輪》食胡做視后，被外界睇好，當事人都話覺得自己响新劇入面表現得唔錯，尤其係講佢不幸患上沙士，要素顏殘樣出鏡，仲話未見過自己咁醜。
嘉欣BB醜上癮。前一晚（十七日）出席《飛虎II》煞科宴，搽咗少少粉底加副粗框眼鏡就蒲頭。又係嘅！如果真係可以靠醜做視后，鍾嘉欣使乜怕醜。
攬住李亞男有化妝嘅鍾嘉欣，同拖住黃智雯無化妝嘅鍾嘉欣，我又以為係吳尊。
據聞今年台慶頒獎禮繼續玩全民公投，嘉欣BB有老師嗌合照，又有學生叫簽名，證明夠晒觀眾緣。
陳展鵬同蕭正楠雖然係呢間小學嘅舊生，但當日最受學生哥歡迎嘅唔係佢兩個，除咗鍾嘉欣，輪到阮兆祥，佢一出場班學生就嗌《獎門人》，搞到老師出聲叫靜啲。
