吳卓羲一向緋聞多多，估唔到連楊秀惠都買佢怕，早幾日下晝5點左右，無綫新劇《忠奸人》演員喺數碼港拍外景，將商場其中一邊佈置成警署，劇情講商天娥同吳卓羲喺警署相遇，有啲好重要嘅事商量，兩個好認真咁，傾傾吓吳卓羲仲有啲黑面㖭。
拍完呢個鏡頭，就輪到吳卓羲同楊秀惠，又係拍佢哋喺警署相遇傾偈，但未埋位唔見楊秀惠同吳卓羲有交流，楊秀惠寧願跟李泳豪同劉天龍係咁玩電話，佢似乎知道有記者，怕同吳卓羲傳緋聞，所以當正對方生人勿近。
娥姐不停自拍
原來當日落雨，好多外景都取消，惟有安排晒喺室內拍。估唔到51歲嘅娥姐未埋位嗰陣好似啲十幾歲港女咁，不停玩自拍，影得唔滿意又嘟起個嘴再影，真係好港女！不過，娥姐冇幾耐就發現記者影相，即刻收手唔敢再影。而佢老公李偉誠又嚟探老婆班，真係好sweet囉！
另外，楊秀惠同莊思敏噚日以性感造型喺鑽石山出席活動，露3吋事業線嘅楊秀惠話做女仔點都要托一托，要有個好bra傍身。莊思敏自爆中秋節被緋聞男友兼導演葉念琛約咗去做新戲《第一次不是你》謝票，係咪葉導演特登安排？莊思敏講笑：「佢得閒，所以搵人陪佢，其實謝票仲有好多人。」
楊秀惠唔敢黐吳卓羲，寧願同李泳豪、劉天龍玩手機傾偈。楊秀惠同莊思敏（左）噚日齊着低胸裙晒事業線。
吳卓羲日前同商天娥喺數碼港拍無綫新劇《忠奸人》。
娥姐十足十幾歲港女咁玩自拍。
from:
http://hk.apple.nextmedia ... 130920/18430485
