王晶執導嘅賀歲電影《賭城風雲》上星期一（九月二日）拉隊澳門拍外景，四個工作日包括一場泳池戲，點知澳門連日落雨，仲係落唔停嗰隻，搞到班工作人員同演員日日standby等雨停。
外景泡湯，進度受阻，上星期日（一號）喺泰國送完師父白龍王，即刻撲返嚟去澳門嘅王晶，唯有擇日吹雞過澳補拍。
導演愁爆，有份埋位嘅發哥就話係白龍王顯靈。
「師父（白龍王）走咗咁耐，阿晶只係去咗泰國一次，但劉偉強就去咗幾轉，劉偉強喺澳門嗰半日，不知幾好太陽，佢走咗剩番阿晶喺度就落雨，到收隊返香港嗰日（六日），個天先好番。」發師父神機妙算，笑話都講到真嘅一樣！
但八珍聽聞王晶今次喺澳門，都有係咁意入賭場打咗個轉試吓手風，最終係有錢贏嘅！唔，風調雨順，王晶手風好，雨為水見財，主吉利。
Set好機就落雨，導演唯有叫全世界返入室內繼續standby，包括發哥。
因天雨令外景受阻，加上有工作人員冧廠，王晶愁到上面。
等極都唔停雨，發哥發嫂無聊周圍睇，連房內嘅木皮包框受潮浮起，都俾佢哋check到。
杜汶澤奉命犧牲色相落水，點知佢一埋位，個天就傾盆大雨。
