韓國父子真人騷帶挈 成俊BB變巨星韓國MBC以5個藝人父子檔演出真人騷節目《爸爸，我們去哪裏？》播出後，大受歡迎，連皇牌節目《Running man》
無論風頭同收視都俾佢哋蓋過。原因係觀眾可以睇到藝人爸爸同
仔女兩日一夜旅行途中發生嘅趣事。
5個由9歲至6歲嘅藝人二代因節目而爆紅，當中成東日個囝囝、8歲嘅成俊BB，因為個樣成個「小Cool魔」，不單成為廣告寵兒，更吸引大批媽媽粉絲，連韓國女子組合2NE1成員Dara同敏智都做咗佢die hard粉絲，認真唔講得笑。
《爸爸》連帶節目入面幾個小主角都人氣急升，廣告陸續有來，不過講到最把炮嘅成俊，單係個人廣告都接到手軟，人氣直頭同當紅偶像有得揮。
就讀3年級嘅成俊最煞食係性格比較穩重，個樣靚仔得嚟又酷酷哋。節目一出咋，即變成女人湯圓，犀利過正牌「Cool魔」張智霖，徐嬌話鍾意佢，女子組合成員為佢展開爭奪戰，難怪老竇成東日都要呷囝囝醋咯﹗
成東日40歲先有成俊，雖然「老來得子」，但冇對成俊特別寵溺，相反仲好嚴肅，所以成俊錫媽媽多啲。但透過《爸爸，我們去哪裏？》後，父子「互相了解」，依家就好到讓媽媽妒忌。成東日（47歲，演員，電影《超級巨猩3D》飾無良經理人）囝囝成俊（8歲）
2NE1成員Dara更喺微博留言話成俊係自己理想型喎！成俊魅力真係沒法擋。
得節目帶挈，廣告湧住嚟，食嘅、用嘅、着嘅，包羅萬有，早前成東日父子又拍咗個Pizza廣告啦！
節目真實冇花假究竟《爸爸》節目好睇在邊呢？話說5個大忙人爸爸，要喺冇經理人、冇老婆幫手下，帶住囝囝同囡囡去唔同嘅鄉村作兩日一夜旅行。幾個小B突然離開一向照顧自己嘅媽媽，跟平日甚少單獨相處嘅老竇去到窮鄉僻壤，肯定唔習慣。班依賴慣老婆、乜鬼都唔識做嘅大男人喺節目中既要煮飯又要湊仔，搞到手忙腳亂。
整個節目嘅亮點，唔係小B去做大任務，而係節目中大人同細路嘅反應同對話，足本播出，絕對「無添加」。
《爸爸》大受歡迎，除咗帶出父親與仔女嘅親情外，亦訓練細路獨立、懂得友愛、關懷同有正義感。據悉湖南衞視同無綫都已買咗版權，湖南衞視搵咗「長青小旋風」林志穎及孫楠父子演出。無綫就有林子博、林盛斌（Bob）及胡諾言等開拍港版。成績如何？拭目以待啦﹗
為要訓練小朋友合作精神，成俊同智慧（後）負責向鄰居攞食物（左圖）；而尹厚（右）及俊秀（左）就要負責摘菜。
除咗要細路完成任務外，大人一樣要落手落腳，睇吓金成柱煮飯嗰種手忙腳亂法，就知佢喺屋企係十指不動嘅人嚟啦！
講真，五個爸爸中，除咗李鐘赫叫做有啲名氣外，其他四個都只屬二線藝人。
李鐘赫（１）
（40歲，演員，《紳士的品格》飾演李正祿） 囝囝李俊秀（5歲）
宋鍾國（２）
（34歲，前國家足球員） 囡囡宋智慧（7歲）
金成柱（３）
（40歲，節目主持人） 囝囝金敏國（8歲）
尹敏洙（４）
（33歲，歌手） 囝囝尹厚（6歲）
無綫開拍港版《爸爸》熱潮席捲中港，湖南衞視嘅中國版有林志穎及囝囝Kimin（左圖）任主要嘉賓；無綫嘅則有阿Bob、胡諾言等。夠晒熱鬧。
設計：陳永安
