無綫重頭劇《衝上雲霄II》效應hit爆全城，o靚模王璐瑤（LuLu）亦唔執輸，日前遠赴美國塞班島旁的天靈島，學揸小型飛機，被大讚有潛質做飛機師的LuLu，更笑言希望轉行，懶理模界互寸爭上位，寧願在天空飛翔！
LuLu因「衝上雲霄」效應，赴美學揸小型飛機。
最近無綫劇《衝上雲霄II》除了成為城中茶餘飯後熱話，更帶來「衝上雲霄」效應，不少人都渴望一嘗在天空飛翔的滋味，連LuLu亦忍不住追尋這個天空夢，急急腳拉埋友人於上周五（2日）由香港出發到美國塞班島旁的天靈島，跟隨機師學飛，她形容出發過程毫不簡單：「個島勁偏僻，因為香港冇直航機去個島，所以要先由香港去廣州，之後再轉機去塞班島，跟住再搭八分鐘小型飛機到天靈島，成個過程差唔多要十個鐘o架！」
機師大讚有天分
雖然LuLu形容出發過程相當辛苦，但當她完成歷時三十分鐘飛機課程後，即打趣地道：「原來揸飛機好似打機咁，勁好玩！架飛機有個類似標靶嘅物體，我淨係需要對準佢嚟穩定方向，如果佢郁歪少少，我就移返向左或者向右就得，當然全程要非常專心，所以學咗半個鐘就已經好攰喇！」
LuLu完成三十分鐘小型飛機課程後，獲得證書嘉許。
LuLu獲機師讚有潛質。
她又透露獲機師大讚自己：「咁啱教我嘅機師係香港人，佢同我講唔係每個人都揸到咁穩定，所以勁讚我有潛質做飛機師！」談到會否想轉做機師時，LuLu笑言：「都想o架！最近香港模界太多人鍾意互寸，自己覺得好煩，如果可以嘅話，我真係寧願喺天空上面飛，去欣賞吓世外桃源好過！」
from:
http://orientaldaily.on.c ... /00282_050.html
