李思捷與美味天使王宝宝「春卷」已是公開的一對，惜男方經常有女伴埋身兼毫無避忌，一直啞忍的正印女友春卷曾鬱到「鬼剃頭」！終於醒覺的她昨日單方面宣布分手，慘遭狠飛的思捷懵然不知，反問記者真偽，並即大讚春卷力圖箍煲，望挽回舊情。
昨日春卷出席活動時有戴帽，未知是否遮掩「鬼剃頭」？
李思捷與擁有魔鬼身材的美味天使王宝宝「春卷」撻着多時，戀人關係在圈中已是半公開，思捷更曾遭方中信取笑是「喼汁哥」，食春卷要點喼汁，他亦十分受落。可惜異性緣旺盛的他，經常被傳媒拍得與不同異性約會，令春卷大為不滿，但每次思捷總有方法氹掂女友。不過思捷很快又故態復萌，春卷忍無可忍，昨日單方面宣布分手，怒飛花心男友。
「佢不嬲都多緋聞」
春卷昨日出席水着模特兒比賽活動，被問近來減少曝光是否專心拍拖？她說：「我冇拍拖，專注工作。（分咗手？）唔講，唔回應！（最近有冇見思捷？）有出嚟食過飯。（依家變番朋友關係？）We are still really good friend（我們仍然是很要好的朋友）！」再問她是否因了解而分開？不諳中文的春卷不明所以，要記者解釋指兩人相處漸久才發現問題所在，她才說：「每一段關係都會有自己嘅問題，不過呢個係我同佢嘅事，我唔想講。（因為男方太多緋聞？）佢不嬲都多o架啦！」
思捷得知被飛後即大讚春卷，似試圖力挽感情。
春卷坦言半年前曾患鬼剃頭，並指着甩頭髮的位置。
思捷被傳媒追問時頻頻抹汗。
春卷難忍男友花心，故單方面宣布分手。
另一邊廂出席魔術師活動的思捷懵然不知女友單方宣布分手，對於春卷表示現時是單身沒拍拖，似暗示已分手，他聽罷表現愕然，並反問記者：「佢咁講呀？（同春卷分咗手？）不嬲唔答，好少公開講，唔鍾意用感情事免費宣傳。」問他現時是否單身？思捷無奈地說：「想我答咩？不嬲唔講。（同春卷咩關係？）very special，我同佢關係非常之好，佢永遠絕對係我身邊好close嘅朋友，係好好，冇變過。如果我話我哋唔熟係大話，我唔會咁衰格。同佢感情上冇變，大家互相都冇。」看來思捷未能接受被女友狠飛，除不肯承認分手一事外，還大讚春卷，揚言要給她200分。
狂派like試圖箍煲
至於因何分手？思捷說：「唔講感情事。（因為你多女？）依家四周（手指着街頭）都多女啦！（春卷今日講分手事前有冇同你溝通？）佢anytime都可以講自己嘅事，佢講乜我都尊重佢。人係有自由，對於佢本人我係讚，咁多年都好好。（有指你『照顧』佢？）話啫，佢不嬲都好勤力，好叻女，自己接job，佢個人比實際年齡成熟，我要畀個like佢。」再問是否因他花弗而令女友失安全感？思捷不認為自己是花心，那會否祝福對方找到另一半？他似乎不太願意地說：「搵到就祝福啦！」
此外，春卷早前接受本報專訪時曾透露有壓力，半年前更出現「鬼剃頭」。她說：「半年前我為家庭、工作同私人問題感到好大壓力，我就不斷打機發洩，試過一日打十二個鐘。打打吓開始發覺自己有脫髮迹象，頭頂一個一個窿，出現鬼剃頭。」她當時有告知母親及思捷，思捷胞姐還介紹醫生給她。問是否因感情事而出現「鬼剃頭」？她拒絕回應，僅稱現時已康復，不過昨日春卷出席活動時就戴着帽子。
from:
http://orientaldaily.on.c ... /00282_001.html
