首先講到Holiday（陳法拉飾）﹑唐亦風（吳卓羲飾）及凌卓芝（胡定欣飾），夾手夾腳幫Sam哥搞相睇活動，佢哋以Sam哥名義Send咗封超級肉麻相睇信，俾婚姻介紹所，當堂激到Sam哥死死下，不過Sam哥個嬲樣又幾可愛啵，應該冧死唔少女粉絲﹗
噚晚集《衝上雲霄II》劇情都幾輕鬆惹笑，Sam哥（吳鎮宇飾）同Captain Cool（張智霖飾）輪流發功冧女。
鏡頭一轉，就講到Holiday孖住Sam哥去餐廳相睇，Holiday仲識做咁幫Sam哥解開一粒恤衫鈕，等佢更加Man，不過Sam哥睇落都係似0靚坤多啲。佢哋到餐廳後，就分頭見相睇對象，Holiday就見到金剛喺度chok住玩啤牌，金剛仲突然Santino上身，仲抽晒水話Holiday都識得45度角喎，之後佢就玩啤牌魔術，諗住變紅心A，點知抽咗隻Joker出嚟，衰咗，當然Holiday冇佢咁好氣啦，佢坐咗一陣就「變走」自己﹗
戲肉梗係留返喺Sam哥同相睇嗰位女生啦，邊位女生咁幸運呢？登櫈~~冇錯，重口味阮小儀出場了﹗
小儀以女僕Look示人，劈頭用國語講咗句暗號：「你知道我在等你嗎？」當堂嚇窒Sam哥，Sam哥勉為其難同小儀握手，小儀又話自己朋友讚佢好似貓一樣咁性感喎，wow~~呢個時候Sam哥人有三急要去洗手間，小儀擔心Sam哥借尿遁，就企喺洗手間門口守候，之後小儀和盤托出，自稱係婚姻介紹所老闆娘，其實係幫人相睇，期間Sam哥建議小儀着得唔好咁重口味，Sam哥仲爆金句：「唔係個個都可以食咁鹹，好傷腎0架。」
跟住佢又約Sam哥去睇戲，又借啲易蹺住Sam哥隻壯臂，再順勢挨落佢，噢﹗不過Sam哥都冇乜嘢，只係搞笑話睇戲時唔好挨落去就得喇﹗
from:
http://hk.apple.nextmedia ... 130726/18350694
