喺《一路向西》飾演學生妹嘅內地女星莫綺雯，原來今年都會推出寫真集，佢老友張暖雅前晚喺書展捧佢場，兩個都以性感裝束示人，不過谷晒胸嘅張暖雅著到條裙離晒罩，佢承認自己有加墊。
對於今次特登捧好友莫綺雯場，張暖雅帶點噓唏話：「我覺得香港女仔博得好勁，我哋冇咁多花招，所以會將書嘅收益其中嘅兩萬捐去紫藤呢個機構。」
張暖雅覺得喺生活當中，中國女仔嚟到香港，好多都受到歧視，佢眼紅紅仲話：「我EQ依家高咗，初期嚟到香港，我喊過好多次。」最近張暖雅喺微博發放一張爆喊相，問佢係咪因為受歧視而喊﹖佢透露剛剛跟公司解約：「大家方向唔同，北方女仔接受唔到唔公平嘅待遇，我好希望中國女仔自強啲。」
講到佢喺微博狂呻被迫變壞，佢話：「我嚟香港，除咗犯法嘅事，其他我都可以配合公司。」問佢係咪被要求陪客﹖張暖雅話：「我諗佢冇客，我嘅工作係我自己接，但最唔開心係將我嘅工作畀第二個做，為咗媾女而影響我利益，我冇辦法接受，所以我同公司唔使賠錢之下解約，我幫公司賺到7位數字。」記者再追問被要求工作之中，有冇涉及不道德交易﹖張暖雅話：「其實除此之外，有好多嘢都冇辦法忍受，大家覺得我唔靚，年紀又大，公司從來冇撐過我，自己公司都唔欣賞自己嘅藝人，幾努力都冇用。」
from:
http://hk.apple.nextmedia ... 130721/18342468
