徐子珊上月拍劇不慎跣親腰骨，日前與黃子華二人於尖沙咀為新劇《My盛Lady》開工，抱傷上陣的子珊，幸好成場戲齋坐講對白，其間拍攝子華索吻戲份，子珊更狼吞扒飯嚇對方！
黃子華欲向徐子珊嘟嘴獻吻，她即以一招大啖扒飯擊退對方。
女人愛靚唔愛命，徐子珊早前以5吋高踭鞋為新劇《My盛Lady》開工，不慎跣到送院，子珊為免影響拍攝進度，只休息一天便復工，而當日目擊事件經過的子華，直言感內疚。
行路步步為營
日前子珊與子華於尖沙咀某商場平台開工，尾龍骨傷患未痊愈的子珊，為連戲依舊腳踏5吋高踭鞋，幸好全程只是齋坐與子華互動，免得尾龍骨再受壓力，該場戲份講述子華欲向子珊獻吻，惟子珊不肯就範，便以一招大啖扒飯弄到成口肥淋淋來擊退對方，只見子華不時向子珊嘟嘴，足以迎合喜劇效果，不用埋位時，子珊走路時也步步為營。
抱傷上陣的徐子珊，獲前輩黃子華提點受寵若驚。
黃子華與徐子珊於片場工作認真。徐子珊細心為黃子華整理頭髮。
片場照顧周到
對於子珊受傷感內疚的子華，問到開工時有否特別照顧對方？他謂：「我不嬲對佢都好好，尤其見到有水地方都會叫佢睇住，多啲提點囉！（呢套劇多唔多飛紙仔？）都有，但因為監製24小時都喺度，解決到好多問題。（無綫有冇再叫你拍劇？）唔會咁快，大家知我一世人拍幾套劇。（你係收視保證！）當年小強拍咗兩日，直頭想打死佢，點知套劇出街紅過我，所以冇嘢可以保證嘅。」
至於子珊亦直言子華照顧周到，她謂：「之前有場戲拍我拎水潑返番佢，佢真係叫我小心，提點吓！都受寵若驚，多謝佢o架！而家條尾龍骨歪咗少少，要成日去覆診，所以都要小心啲，唔好再畀佢整親。
from:
http://orientaldaily.on.c ... /00282_088.html
