港女永遠都係見高拜見低踩，好似本身有個嫩口女友王寶寶（春卷）嘅李思捷，最近憑《玩嘢王》搖身一變成為人氣王，就連好耐冇蒲頭嘅中女陳雅倫都要同佢玩「姊弟戀」，睇到班盛男得個恨字！
周日（16日），李思捷又出席新劇《熟男有惑》宣傳，劇中老婆李詩韻本身唔多騷佢㗎，玩遊戲嗰陣，仲用手踭頂住思捷背脊，死都唔肯送波餅益佢。曹永廉見到都笑：「你都唔益下公司同事嘅！」搞到李詩韻尷尬到暈。不過轉個頭，思捷喺佢耳邊講兩句，詩韻就任拖唔嬲，兩人仲不時含情對望，眼寃到呢！但講到最眼寃喇喎，要數資深甘草蘇恩磁，一聽到有得騎李思捷，馬上飛撲埋去佢身上，難得男方又交足戲，孭得好enjoy。老中青三代都「食」勻，李思捷真係一代「食家」呀！
李思捷孭起李詩韻，起初女方唔多受，猛用手踭頂實佢。
李思捷邊唱邊拖李詩韻隻手，唱完首歌仔，佢哋都未肯放手。唔使咁投入喎！
蘇恩磁心慌慌上馬，李思捷玩花臣、「扽」咗兩下，嚇到女方「跳車」，仲推埋佢落地。
