無綫最近黃金時段收視跌，不得不諗計救亡，難怪急召福將黃子華回巢拍新劇《My盛Lady》，仲日夜趕工，有傳提早至今年推出救收視！子華、徐子珊同王君馨前晚喺中環拍攝新劇外景，劇情講子華同子珊教君馨拍拖，着上貼身裙嘅子珊chok樣，佢仲同子華攬頭攬頸嘟嘴合照，港女上身纏住子華。不過因收音問題，工作人員喺眾目睽睽下喺子珊裙底整收音咪，吸引班內地自由行男士眼甘甘。
子珊從後「冤」住子華，誘惑欠奉，反而有啲鬼片feel。
子華唔敢救亡
現場見子華同子珊有扮咀戲，不過子華話劇本未有真咀戲，咁有冇飛紙仔呢？子華就話：「已經有幾集劇本，第一日為TVB拍劇都係咁，盡力配合，唔少劇都有咁嘅情況，好難有齊劇本，咁當然最好似外國劇每季只拍十幾集，唔同市場冇法子。」近日無綫黃金時段劇集收視慘淡，子華話：「與我無關，我都有預定呢日！每日最重要享受拍嘢，每日開開心心最重要。」
同子珊合作成點？子華話都幾合拍。會唔會拍完即刻推出救亡？子華就話：「未有耐，唔好咁講，我冇咁犀利，不過次次都OK，相信呢套都OK。」問子珊同子華合作有冇忍唔到笑而NG？佢話：「佢異於常人，高自己好多班，係神級中嘅神級。」
子珊同子華當街玩自拍，好多人湊熱鬧。王君馨chok甫出巡，點都有啲觀眾嘅。
from:
http://hk.apple.nextmedia.com/entertainment/art/20130515/18260089
