黃子華迷終於等到喇！子華噚日同徐子珊、細細粒陳嘉佳喺烏溪沙為無綫新劇《My盛Lady》首日開工，好鬼瘦嘅子華精神奕奕嚟開工，佢接受訪問時話：「我之前每日都用成個鐘做運動㗎。」證明子華都好緊張個劇，講到佢個角色，子華話：「角色係令人討厭嘅人，但相信觀眾會覺得我好可愛，我係專幫啲盛女搵好歸宿，唔收錢嘅人生教練，細細粒係我第一個幫嘅人。」
子華自己喺劇嘅感情線，原來除咗子珊外，仲有個真命女友，但𠵱家佢都未知係邊個。講到佢身形咁弗，子華抗議：「全無綫啲花旦都咁瘦啦！」但子珊話怕你抱佢唔起喎？子華話：「放心，我拎起件衫有二頭肌，好驚嚇，瘦骨仙都有肚腩仔，我係小肥仔。」問到佢係咪搵患病嘅張達明客串，子華話：「上次純傾偈冇講工作，等佢身體完全康復先啦，我知佢有幫幕後做嘢，充滿精力。」
子珊雖然瘦咗但「肉」腿依然好肥美，拍埋黃子華嘅牙籤腳真係蚊髀同牛髀。
子珊跑步操弗
首次同子華合作，子珊話：「同子華對戲好好玩，比想像中輕鬆。」子珊都話為咗弗啲嚟開工，之前都狂做運動跑步，雖然子珊話自己瘦咗，但拍埋子華度都仲算係肥。而細細粒因為同子華合作，緊張到前晚瞓唔着，佢話第一次有咁多戲份，所以做咗好多功課，細細粒話遲啲佢喺另一套劇《貓屎先生》入面會同王浩信拍拖，仲又尷尬、又冧咁話可能有咀戲㖭。
細細粒能夠同子華合作，前晚緊張到瞓唔着。子珊（左）同細細粒為無綫新劇開工，兩個都好開心可以跟子華學嘢。
from:
http://hk.apple.nextmedia.com/entertainment/art/20130507/18251470
