黃婉曼同詹瑞文噚日先後去到中環幫nowTV節目《星級診症室》錄影，黃婉曼負責解構乳房檢查，仲即場拎住個啫喱狀乳房示範。擁有32F豪乳嘅佢中學已經開始去醫院檢查胸部，真係保養得宜，咁着重胸部，自我檢查應該唔少得，黃婉曼話：「咁尷尬，好少喎，畀醫生檢查多，又或者會去美容院按摩就有，好少自己摸自己。」
出名上圍豐滿嘅黃婉曼，坦認隨住年紀越大，胸部有下垂嘅迹象。黃婉曼以假乳房教自我檢查。
「夠餵小朋友就足夠」
講講吓黃婉曼仲自爆驚地心吸力搞到胸部下垂，佢話：「以前喼弗會跑步，但𠵱家為保護自己好少跑，因為有地心吸力，又驚面部皮膚鬆弛。」佢仲坦承32F豪乳開始有啲下垂，所以要努力按摩，又話唔鍾意自己胸部過大，着衫唔好睇，有人提議佢不如縮胸，黃婉曼話：「又未咁嚴重，唔會阻礙正常發育，第日夠餵小朋友就足夠。」
另外，詹瑞文即將同盧海鵬開騷，問佢會唔會叫梁洛施（Isabella）捧場，詹Sir話：「近日同對方少聯絡，但每次同佢食飯都畀記者見到。」事實上搵到Isabella嘅圈中人都只係得詹Sir，佢聽到後即話：「咁我咪做咗佢回港agent，咁大任務，唔做啦！」
from:
http://hk.apple.nextmedia.com/entertainment/art/20130430/18244247
