陳冠希（Edison）日前喺銅鑼灣出席自家品牌CLOT嘅慶祝派對，嗰晚竟破禁提舊愛鍾欣桐（阿嬌）同張栢芝，仲笑晒冇黑面，不過派對前Edison同拍檔潘世亨（Kevin）接受有線新節目《賺大錢》專訪時，就黑面黑足半粒鐘，因為佢態度差，據知有線擬封殺Edison，個專訪都會抽起唔播！
陳冠希竟然俾人氣呢個話題辣着，真係估佢唔到！（左起）潘世亨、Edison同鍾健威錄影時，明顯有人唔愉快。
主持呻唔受尊重
有線之前同Edison方面傾好晒，講明只講佢生意唔提緋聞，點知由埋牙訪問開始，Edison已經顯得唔多耐煩，直到主持鍾健威（Ray）問到Edison嘅舖頭品牌同佢嘅人氣掛鈎，佢人氣升降時品牌或受影響，佢會點處理呢？估唔到人氣問題竟然辣㷫咗Edison，佢即刻黑面反問：「乜嘢人氣先？」跟住就唔合作，唔多想答主持問題。因為Edison冇乜點答嘢，結果訪問縮短咗三分之一就結束，事後鍾健威喺facebook同朋友呻做訪問唔受尊重，同時上載咗張同Edison、Kevin做訪問時嘅相，主角呼之欲出，原來Edison唔怕講阿嬌同栢芝，係怕人講佢嘅人氣！
俾人藐嘅鍾健威噚日喺電話中承認，訪問有少少唔愉快，佢話：「條問題唔係提佢嘅緋聞，可能佢敏感咗啲，當時係有啲哽住，不過做完節目就算。」
from:
http://hk.apple.nextmedia.com/entertainment/art/20130429/18243192
