大隻仔吳尊同鄭伊健、鄭少秋、林峯合演嘅新戲《忠烈楊家將》下個月就上，噚日電影公司發相，出名多肌肉嘅吳尊因為劇情需要，講佢接受阿爸鄭少秋教訓，要赤膊跪地受教，露出一身令𡃁妹尖叫嘅肌肉，但因為吳尊以前喺墨爾本讀大學嗰陣已經喺右臂紋身，另外背脊同腳面都有，衰在套戲係古裝，冇理由古人咁潮，所以發相同條片都要執走佢右臂嘅紋身。
吳尊原本右臂有個大紋身，因為係古裝片要用電腦執走。吳尊呢個紋身，早喺墨爾本讀大學嗰陣就已經有。
吳尊同成班兄弟噚日喺北京宣傳部戲。
另外，噚日導演于仁泰率領吳尊、伊健、林峯同周渝民去咗北京宣傳，因為型男眾多，現場粉絲多過傳媒，有記者故意問嘉賓邊個最靚仔？結果幾個靚仔話冇嚟嘅秋官最靚仔，真醒！伊健喺記招話拍呢部戲最大享受係識咗班兄弟，佢用伊健式普通話話：「拍完後感情還在，把這個友誼放在戲裏很開心。」唔知佢係咪將楊家兄弟當做洪興兄弟咁看待呢？而暫時掉低女友千語BB嚟做嘢嘅林峯，都話同伊健一樣，好開心同呢班兄弟結緣，佢仲話要同馬拍戲係好辛苦嘅事，搞到傷晒，真係心痛死BB。
from:
http://hk.apple.nextmedia.com/entertainment/art/20130307/18186873
