《老表，你好嘢！》收視人氣雙贏，連帶一班綠葉演員亦有運行。肥妹小寶成新女神，鬼妹明恩借勢出碟；戲中演勾義嫂反骨仔的Bob林盛斌更加戰鬥格，平時密執月入已過廿萬，近年更炒埋工廈商舖，身家水漲船高。反而最老資歷的黃光亮原來是鱷魚頭老襯底，因為鍾意唱歌自資出碟，竟錯上賊船，三十萬血汗錢，一鋪清。
身家二千萬
靠把口搵食，新城電台曾與范振鋒、杜浚斌合作做節目《新香蕉俱樂部》的Bob林盛斌，未加入無線前已經踩行油密密搵，接job做主持，早已是有樓階級，最近踩多瓣拍電視劇《老表，你好嘢！》，靠著一身肥肉和假髮，竟然搶贏郭晉安，跟湯盈盈拍床上戲。戲中搵銀戰鬥格的他，現實亦一樣，即使新城份糧只有二萬幾，無線騷錢又貴極有限，但一味密做活動主持，山大斬埋有柴。
「早排新城裁員，好多DJ都要減半人工，阿Bob拍檔杜浚斌都係，不過阿Bob冇因為咁影響收入，主持出騷價三萬加上做埋搞手度埋稿，月入起碼廿萬。」知情人說。
阿Bob負責搵，老婆負責投資錢搵錢，兩公婆目前揸住兩個位於旺角的住宅單位，市值超過一千二百萬，另外還有一個商廈單位收租；還在油麻地開潮服店和大埔有間首飾店，身家超過二千萬。
「好想多謝聲哥（監製黃偉聲）和祖藍，佢哋搵我拍《老表》。」人氣升荷包脹的阿Bob說。
密密接show，阿Bob做一粒鐘收三萬，不過未開騷前，他先跟工作人員開會掟橋，口腦並用。
阿Bob在劇中借醉勾義嫂鍊贏郭晉安，被網民指扮豬食老虎。
1200萬單位
對旺角區情有獨鍾，他在同一幢大廈買了兩個單位，共值1200萬。
新開飾物店
09年在油麻地投資潮服店，因生意好，去年搵了個2千呎鋪頭擴充。去年底又在大埔超級城開舖賣飾物。
劏到一頸血
初次拍劇，在九十年代專做惡人的黃光亮，原來亦表裡不一！與他在《老表》中飾演王祖藍老豆一樣，是一隻披著狼皮的羊。人善被人欺，一把年紀的黃光亮○九年因為發歌星夢，搞到被人當水魚劏。
小學參加歌唱比賽，曾以一曲《相思河畔》奪季軍的黃光亮，○九年自資出碟，還搵了一個香港唱片監製一手包辦製作。兇神惡煞得個樣的黃光亮，變成他人發財工具，做一首歌由本來平極幾千至貴到幾萬，但他灌錄一首《中國氣概》，便花了十幾萬。
據悉當時黃光亮遭人劏到一頸血，仍懵然不知，直至到廣州為新歌開發布會，他才聞出𤓓味，如夢初醒。
《老表》帶挈鬼妹陳明恩夢想成真，處女出碟，王祖藍還幫她的新歌填詞。明恩和媽媽爸爸（左、中）熱愛音樂，一家人已經可以湊夠腳打Band。
《老表》的抵死對白，便是出自龍文康（左起）、吳沚默和馬焱三位的手筆，來自珠海的吳沚默更因外形出眾，被無線招攬入藝訓班，打算幕前發展。
黃光亮認豬
「嗰個唱片監製另外再收咗黃光亮近廿萬去搞發佈會，但出嚟結果係變成對方公司新人推廣宣傳，介紹班新人都用咗大部分時間，黃光亮全程只出場五分鐘，仲要得三幾個傳媒到場，對方就係睇準黃光亮份人唔計較，當佢傻佬！當日有班行內人嚟撐黃光亮場，佢哋都睇唔過眼，問佢究竟花咗幾多錢，先知佢前後使咗三十幾萬，大家忍唔住踢爆佢俾人搵笨。黃光亮好嬲，但都冇當場發火，只係即刻執嘢走。所以咪睇佢個樣咁惡，其實得個殼。」知情者說。
黃光亮對記者重提他唱歌被人搵笨一事，劈頭第一句就話：「唔好提我啲傷心事！」
之後又自嘲一番。「我係豬兜！以後唔會再諗做歌手出唱片。（點解當時唔追究？）當俾錢上堂買教訓，不過呢筆學費又真係幾貴，哈哈！」
一度誤傳是父子的王祖藍同黃光亮，在《老表》中將計就計演父子，大受歡迎！因發歌星夢，外形兇巴巴的黃光亮變成任人宰割的傻歌手。
在電影《監獄風雲》一副惡相演「傻標」，從此深入民心，現實卻是老襯底。
投資損手
性格豪爽，耳仔軟的黃光亮，92年投資開戲《何日金再來》，票房慘淡蝕過百萬，08年投資拍法國動作片《Last Hour》，又因發行傾唔掂，千萬投資血本無歸。另外，在內地搞過木廠生意的他，亦因損手結業。《何日金再來》
有人情味
《老表》推出後引起大眾話題，劇中演員亦成為追訪焦點。早前有多間傳媒採訪車，在黃光亮沙田寓所外等候，他主動行出來跟傳媒打招呼吹水。
之後黃光亮到灣仔出席「世界和平藝術團義演活動」，揸波子的他索性向傳媒講定目的地，並叮囑：「慢慢揸，安全至上！」活動後，他更邀請一班追住他的傳媒放下「架生」，以朋友身份和他同枱食飯。舊一輩的藝人，果然較有人情味。
