MK仔期待的《古惑仔：江湖新秩序》本週四上畫，由羅仲謙、梁烈唯和沈震軒等新仔擔大旗，重演16年前首代古惑仔的MK情懷。
主角用得新人，監製王晶擺明想小本經營，但可惜起用的新仔導演唔生性，令原本預計一個月完成的影片，結果拍足3個月，搞到一班主角如羅仲謙、梁烈唯等開工時間長成倍，最慘係酬勞唔加工時加，謙仔變廉價勞工，古惑仔真係唔易做呀！
王晶翻拍16年前經典土炮漫畫《古惑仔》，新版浩南哥羅仲謙同山雞梁烈唯週四（10日）硬撼王家衞套N年鉅製，由梁朝偉、章子怡主演的《一代宗師》，係咪以卵擊石未知，不過晶哥為怕三級版本減低MK仔入場收益，早已事先剪輯兩個版本（IIB級和III級）盡量吸客。
等到躁~據知因導演不肯跳拍，又經常刪改劇情，令主角羅仲謙等人等多過拍。
俾王晶睇得起嘅新紮導演陳翊恆，之前拍過另一套三級古惑仔戲《紮職》，晶哥諗住佢會駕輕就熟，點知拍足3個月
羅仲謙飾演的浩南同山雞梁烈唯情同手足，但有睇過試片的工作人員卻稱，片中兩人友情竟拍到似基情歲月。
床上最激~沈震軒跟梁敏儀的一幕激烈床戲，梁敏儀露點演出算係全片最爆場面，但只在三級版有得睇。
敢怒不敢言
王晶緊張新片，只因最初諗住小本經營的本地製作，可以一個月極速起貨，但今次由拍過陳偉霆套《紮職》的新手導演陳翊恆操刀下，卻令製作時間嚴重超時。有工作人員透露：「導演（陳翊恆）拍得好慢，除咗經常改劇情外，又唔肯跳拍，結果搞到班演員等多過拍。有時拍完啲戲又cut咗，好似之前莊思敏拍咗場同性咀戲，但最後都成場cut咗，最慘係有演員由最初預計10幾組加到20幾組，時間長咗一倍。」
拍攝時間長，雖然說好的續集還未落實開拍，但一眾演員因怕得罪王晶，故不敢開口叫加價。對於有《古》片演員不滿，王晶週一（8日）接受電話訪問時說：「（製作時間）都係預期咁啦，係預計之內，（有演員覺得蝕做喎？）冇乜特別有人同我提出過喎！」而主角羅仲謙則透過經理人公司星皓王小姐說：「係加咗組，不過晶哥話想個結局好睇啲，所以我哋都配合。」至於片中另一演員莊思敏亦說：「係拍多咗，我都唔知點解場咀戲cut咗，導演冇同我講！」直接叫晶哥回水，想以後唔撈咩？
新𡃁坤搶過浩南哥
雖然《古惑仔》系列一向係陳浩南做主打，但於新版中，飾演𡃁坤的沈震軒才是片中亮點，除了有跟梁敏儀的激烈床戲外，又要俾火燒死，絕對奸得搶鏡。
沈震軒飾演的𡃁坤造型眼神夠邪惡，但最終要俾陳浩南用火燒死。
未見細細粒
由王晶新寵童菲飾演的浩南女友細細粒，只在首集片尾過鏡，要到續集先正式出場，但據知晶哥要等首集片房成績後，才決定是否有續集
古惑仔一向剛陽味重，但新版的海報卻被指基味濃，有網友更稱主角似鴨多過似古惑仔。
新版冇江湖味
《古惑仔》源於資深漫畫人牛佬（原名文啟明）創辦，由1992年創刊至今長達20年，雖然新版《古惑仔》中陳浩南仍然要打生打死，其實最近期的《古惑仔》中陳浩南已退出江湖改行做生意。
16年前原版陳浩南由鄭伊健擔演，雖然新版有大隻謙同梁烈唯等肌肉男，可惜個個青靚白淨，難怪有人話唔夠江湖味。
舊版浩南由伊健飾演，長髮斯文look，形象亦正亦邪。新版都係由斯斯文文嘅羅仲謙演，不過脂粉味較重。
陳小春演嘅山雞非常有殺氣，而今次由梁烈唯𠝹頭再扮，連唯唯都話：「演山雞有難度，因為唔想同佢太似！」
新版大天二搵嚟糖妹男友Dominic擔演，外表冇Laughing哥咁兇神惡煞。
子善都做得唔錯吖！真實對白
由原本肥嘟嘟的林曉峰演嘅包皮，今次就由同樣面圓圓嘅林子善演，唔使惡但勝在夠搞笑。
以前嘅大佬B由吳志雄演得入型入格，有晒黑社會台型，今次由性格一樣火爆嘅黄貫中演，肯定有唔同風格。
