華置主席大劉劉鑾雄因捲入澳門歐文龍貪污案，為專心應付官司，早前任命甘比胞姊陳詩韻為華置執行董事，最近又任命呂麗君為另一位執行董事。雖然呂麗君大權在握，但甘比最近佗仔4個幾月，相信可以同已有一子呂麗君平起平坐，上期本刊就獨家拍得甘比的最新大肚look，引起熱話。
事實上，大劉出名錫家人，不時買名牌玩意送俾女友同仔女，仲成日陪佢食飯，關懷備至。上週六（21日）大劉同甘比、女兒秀樺、甘比媽媽一同銅鑼灣食晚飯後，離開時，司機一早車到場等候，不過佢步出餐廳門口時，一班記者圍住大劉同甘比影相。大劉錫住甘比，示意要佢盡快上車。而為免嚇親秀樺，大肚甘比反應好快，火速帶佢上七人車，大劉則等埋甘比媽媽，扶對方上車，然後先自己上車，照顧周到。
不過秀樺比較好奇，見到一班記者影相，從後座窗口張望，似乎見慣大場面呢！
