今年夏天鬥過你死我活，爭搶鏡、爭見報、爭嘢做嘅兩個E Cup o靚模，浸大咪神楊梓瑤（Carol）同百果園E神陳靜，噚日佢兩個有機會一齊合作，幫同一個品牌嘅網上遊戲做代言人宣傳，Carol同陳靜由大熱天30幾度，鬥到入冬都依然谷胸露腰露背，配襯一身戰鬥格索女戰士造型，搞到全場過百龍友圍住係咁影。
身材谷到爆嘅Carol由台上走到台下派紀念品，佢話一啲都唔擔心件衫走位走光，Carol話之前有度身，件衫相當合身，但係陳靜就冇咁好彩，佢話右邊胸勁離罩，所以全程要用宣傳貼紙黐實。
對於同陳靜傳不和咁耐，今次有機會一齊做嘢，Carol好坦白話：「我哋私下唔係朋友，但從來冇乜過節，我哋見到會有講有笑，冇不和，有錢齊齊搵，大家都咁靚。」
至於陳靜就好謙虛讚Carol身材比自己好，佢話：「我當然想人哋覺得我靚啲，不過佢身材好啲係事實。」陳靜話自己要努力減肥，家108磅，要減多6磅。不過點鬥都好，最終目的大家都係為咗多啲工作搵多啲錢，佢好坦白話唔怕俾人攞嚟比較，最緊要係幫到自己宣傳同賺錢。
同場新8模都嚟宣傳賭博online game，已為人母嘅陳靜儀（Mia）話仔女仲細，未識得玩呢啲遊戲，至於會唔會怕鼓吹賭風，Mia話反而上網賭假錢係一個好好代替真正賭錢嘅方法喎！
from:
http://hk.apple.nextmedia ... art_id=14661712
