奇女子狄娜早前因癌症一度病危，幸好經過多月的悉心治療，情況已經好轉，今年更會在書展推出新書《戰道——北京大商戰》，分享從商經驗。狄娜身為一代艷星，今次在書展中惡鬥o靚模，對於o靚模賣弄性感上位，她昨日語重心長的忠告她們：「唔好學我咁，因為呢個包袱會孭一生。」現年64歲的狄娜（原名梁幗馨）早前因癌病而入院，病情一度危殆，更多次進出深切治療部，其變性兒子馬天如（Michael）更由外地返港貼身照料母親，情況令人擔憂，後來得知她即將在書展推出新書，大家才鬆一口氣。狄娜昨日接受本報電話專訪，從她雄渾的聲線，可知其病情已穩定下來。
狄娜是性感女神變才女的最佳例子。
狄娜將在書展推出新書，但不會舉行簽名會。
《大軍閥》露胸 一生烙印
狄娜17歲出道，70年代接拍了楊權導演的《七擒七縱七色狼》，當中的香艷出浴鏡頭已轟動全城，72年在《大軍閥》中，導演李翰祥要求她裸胸露臀，這一脫令她成為當代艷星。30多年過去，時下的o靚模像是重蹈狄娜的覆轍，原來她都有留意近日o靚模的消息，對於她們只靠賣弄性感上位，狄娜歸咎背後慫恿她們走性感路線的人，她昨日說：「你可以怪嗰啲背後慫恿呢啲妹妹仔嘅人，呢啲細路女主觀願望又覺得自己呢個就係成名、賺錢捷徑，或者可以風頭嚟麻醉自己。但如果冇人去睇，佢會唔會有得風頭呢？連最正經嘅報紙都會登，因為讀者鍾意睇。」
狄娜又以過來人身份，語重心長勉勵o靚模：「我覺得呢班細路女咁樣做好可憐，你以為咁樣係名成利就嘅捷徑，其實以我嘅個人經驗話畀佢哋聽，到今時今日，我做咗幾十年非常正經、非常嚴肅嘅high tech工作，但你翻開報紙，凡親一講到我，不管係雜誌報紙，一定會登晒我以前《大軍閥》嗰啲裸照，呢一樣嘢係你永遠都慽唔甩。」
自嘲反面教材 僥倖成功對於書展漸漸變質，有網民更成立Facebook群組反對o靚模闖進書展，狄娜也認同o靚模不應到書展宣傳，她說：「我覺得好難過同感慨，因為我上年出《從母到友》，辦書展嗰個人話家書展唔係一個文化嘅地方，係一個追明星同埋散書嘅地方。書展呢個場地根本唔適合賣寫真，因為香港人已經好惘然，精神食糧太少，應該有一個地方令人好清新嘅，家香港直頭好似沙漠缺水，如果你鼓勵人寫好啲嘅書，一樣有生意啫，根本唔需要咁樣做（出寫真）。」
談到o靚模Rainbow及Monique輟學全力投身o靚模行列，狄娜嘆了一口氣說：「因為佢哋覺得冇前途嘛！好似我以前俾人鬧到咁，仲有乜嘢前途呢？但前途係可以自己創出嚟㗎嘛！真係㗎，所以我希望佢哋唔好再學我呢個榜樣啦。呢個反面教材佢哋應該吸收到教訓。但我能夠僥倖成功，能夠有少少作為，亦都係佢哋一個希望。」
狄娜痛定思痛，75年棄影從商，在內地發展航天事業，成功轉型成為才女，而她的新書《戰道——北京大商戰》便是以自傳形式描述她在內地奮鬥的經歷及體驗。不過原來她當初沒計劃寫這本書：「至05年知道有cancer之後，我就諗，自己做咗咁多樣嘢，又有咁多讀者寫信嚟，咁你如果行將就木嘅話，就辜負咗好多讀者。」採訪：吳佩思
手術後遺症聞食物作嘔狄娜日前入院治癌，她昨日發放兩張新相，原來是她在上月25日在養和出院當日拍攝。相中她精神不錯，塗了胭脂後那股巾幗之氣不減當年。現時她在家中休養，由囝囝馬天如及其女友照顧。狄娜說：「動過腸手術嘅人食嘢係最論盡嘅，我差唔多有成個幾月係食唔到嘢，個嘴食咗嘢之後變咗酸，或者粉筆咁嘅味。家我啲味蕾慢慢正常番，但都要少食多餐，因為個刀開得太大喇。」
狄娜連續兩年在書展推出著作，從商自傳《戰道──北京大商戰》更成焦點之作，惜狄娜未能現身會讀者：「我都好希望可以去到書展，不過應該唔得喇，大約9月左右，等我體力恢復番，相信可以同傳媒朋友見面，但家氣力仲唔夠。醫生唔鍾意我講咁多嘢，佢話家係crucialtime（關鍵時刻），要等自己傷口埋得好，總之家唔好過份運動，多食有營養嘅嘢，最好食多啲雪糕。我喺醫院嗰陣時膽固醇得零呀，醫生話未見過病人要落咁重嘅消炎藥，掛到成棵聖誕樹咁，第二就係未見過人嘅身體功能跌得咁低，細胞水份得番20，能夠捱到第四刀係冇人信。所以醫生話你家一日食七隻蛋啦，邊得㗎？都食唔到，雪糕家食到少少喇，以前食一兩羮都冇乜味，家聞到嘢食會覺得好香，嗰陣囝囝拎一羮蒸蛋過嚟猛猛我猛擰頭，點都唔肯食，一聞到就想作嘔，好凄凉，真係好凄凉。」
