今年三月，阿嬌鍾欣桐以超筍價接拍服裝廣告強勢復出，可惜外間反應毀譽參半。唔想再手停口停，阿嬌選擇有殺錯無放過，上月就連Botox 瘦身廣告都接，重點處理一雙「甲組腳」。
自稱打了二十支Botox 瘦腿的阿嬌，據知近兩個月來，不斷到舊老闆「修身堂」免費做機強攻收緊小腿脂肪，雙管瘦腿，擺明借張玉珊過橋！
貪小便宜
阿嬌曾經講過，昔日經常黑口黑面因為擔心淫照外洩。時至今日憂心變為事實，但阿嬌嘅面色，未有因此而改變。五月中，有人多次目睹阿嬌黑面出入「修身堂」，事後仲聽到員工埋怨：「聽講話阿嬌成年無上過去，突然呢兩個月密密嚟做機，對啲員工要求多多，又成日黑面，當正自己天王巨星。」知情人說。
其實阿嬌與「修身堂」的合約，早在四年前已完結，不過老闆娘張玉珊出名大方，只要藝人本身做過公司代言人，落鋪做療程一律唔收錢。
着數大過天，阿嬌亦貪得就貪，幾年來不斷到「修身堂」免費做facial 以及做機瘦身，除了淫照事件發生後整整一年唔見人，今年初在復出前夕再度積極落鋪，五月份更愈做愈頻密，平均一星期有三至四日現身，主力做機修小腿。局部減肥背後原因，原來阿嬌已靜悄悄簽約做Botox 減肥代言人，一直蒙在鼓裡嘅張玉珊，直至有職員通風報信，才知阿嬌連月來做機，無非搵佢過橋。
入黑名單
靠陰招瘦身雖然成功過骨，但阿嬌的復出大計，依然四處碰壁。原本打算主力到國內工作的她，因受到內地封殺緋聞藝人禁令影響，出席公開活動甚至拍劇都無機會。工作量不多，英皇方面於是積極為她訪問，keep 住一定曝光率。
昔日Twins 年代孖妹做訪問，大牌子借衫無任歡迎，經歷淫照一事，名牌時裝對阿嬌的形象大打折扣，紛紛將她列入黑名單，拒絕借衫，令一班為她做形象設計的工作人員無從入手，堅持以潮牌靚衫示人的阿嬌，唯一方法只有真金白銀買定大堆靚衫見人，荷包大重傷。
同人唔同命，同樣受淫照事件影響的張栢芝，唔使為荷包奔波，閒來帶住Lucas 遊台灣，還有內地寢具品牌垂青，重金聘請做代言人！
便宜莫貪呀！（設計對白）
09 年 阿嬌到「修身堂」免費瘦腿，之後公開成為Botox 瘦腿代言人，幕後功臣其實係張玉珊。
上月阿嬌打Botox 做代言人的報導出街，張玉珊才得知對方兩個月內頻頻到「修身堂」做機修小腿。
08 年 去年初淫照仲未曝光，阿嬌出席無綫《十大勁歌金曲頒獎禮》，deep V 晒身材，卻被一雙「甲組腳」大煞風景。
