春卷王宝宝喺facebook 度大解放，但家陣做咗調味妹就忽然好密實，死都唔拎開枕頭，佢話：「Wilson （《美女廚房II 》監製錢國偉）唔畀性感呀！佢會鬧㗎！」之後問佢鍾唔鍾意小方，春卷即話：「唔好迫我啦，我寧願揀鄭中基嘞！」《美女廚房II 》首播高開30 點，超過190 萬人睇住Angelababy 點變地獄廚神，不過毒男睇女最緊要新鮮，喺三位男主持旁邊嘅「美味天使」就啱晒口味，梗係嗱嗱聲多兩眼最實際！
不過靚女要搶鏡，首集「美少女廚神」Rainbow 因方力申狂溝而出晒位，不過天使之一嘅春卷王宝宝（Lukian Wang ）都唔弱，喺facebook 發功公開半裸照，憑美色成功俘虜6 百幾位男fans 做佢黨員，班女鬥搶鏡好出力，講鬥志勁過屯門普高多多聲。
《美女廚房II 》總共有六位調味妹，唔計之前喺《耳分高下》出身嘅藍莓劉俐、大桔陳蕊蕊同香蕉王淑玲，今輯就得腸粉春卷豆沙包係全新面孔，集集都要繑實班嘉賓出場。
春卷王宝宝
今年18 歲嘅王宝宝有成5 呎8 吋高，雖然唔識睇中文，但都知咩叫港女89 宗罪，佢就好老實話揀男朋友都要視乎經濟能力：「搵錢幾多唔緊要，我唔使男友次次請食飯，但就唔可以叫我養番佢囉。」
春卷喺自家facebook 內有大量靚相，其中呢張係春卷幫日本內衣牌子Otto 影嘅造型相，佢話做內衣模只係做過呢一次，之前都未試過喎！
王宝宝係Kitty's modelling 嘅model ，即係港姐馬賽同姚婷芝嘅港姐提名人，佢喺facebook post 咗自己幫公司影嘅宣傳照，照片入面好大膽咁齋着條三角底褲以長髮遮胸疑似半裸，不過宝宝強調上身有打底喎！
性感相任睇
