小朋友一個搭住一個穿梭場中玩接龍，並跟隨強勁的音樂節奏起舞。
以前，父母聽到仔女落disco 玩，會擔心佢哋識到啲壞朋友，一定極力反對。
但依家父母不單唔阻止，仲齊齊落D 玩埋一份。
講緊嘅係最近香港hit 爆的親子Baby Loves Disco ，既冇啤酒、烈酒，更不會有人fing頭索K ，場內提供的是fruit punch 、果汁，而在舞池中的是一班腳步未穩的豆丁，伴隨著強勁的音樂節奏扭動屁股起舞，相當興奮！
現場有工作人員免費替小朋友化妝及set 頭，變身後的小朋友即刻型爆全場。
一身海盜打扮的維維，聽到音樂就扭著屁股un 下un 下，十分可愛。
上周日Baby Loves Disco 舉行萬聖節派對，吸引近200人參加，擠得場內水洩不通。一班小朋友為配合派對主題，齊齊扮成可愛造型，包括海盜、蜘蛛俠、蝙蝠俠、變形金剛及一眾小嘩鬼，在下午3時活動開始前已聚集門外等候入場。
有工作人員扮成《奪命狂呼》的恐怖造型，嚇得一班小朋友而嘩大叫。
全場年紀最細約1歲的小女孩，化身做小天使，跟著爹哋媽咪感受熱鬧氣氛。
嬌俏可人的南瓜公主，討人歡喜。
Norman （左）和CoCo （右）將Baby Loves Disco 引入香港，這天他們也帶同歲半的女兒來參加派對。
1歲BB 也來跳舞
Disco 活動開始後，小朋友都急不及待跑到舞池，一邊玩著五顏六色的氣球，一邊隨著節奏強勁的音樂不停跳動。現場所見，他們有的僅一歲多，走路尚未穩健，就由父母拖著一扭一扭的跳舞，小朋友或父母都玩得很投入。
Baby Loves Disco 以小朋友為主角，場中設施亦很照顧他們的需要，例如舞池後設置了育嬰室，方便家長替孩子換片或餵奶。而場內的櫃子或枱角都包上海綿墊，以防小朋友撞傷，心思相當體貼。
全場的高潮是搞手Norman 帶領著所有參加者，跟隨著經典歌曲《YMCA 》一起跳舞。小朋友模仿大人高舉雙手邊跳邊唱「Y-M-C-A 」，令全場氣氛高漲。雖然場地面積不算大，參加人數眾多，令場面明顯有點擠逼，但氣氛卻是融洽又熱鬧。不過，亦因舞池細小，小朋友跳舞時一不小心就會互相碰撞，所以父母都要緊貼孩子做貼身保鑣。
場內提供三文治、薯條等小食，飲品有不同口味的果汁，大人或細路都啱食。
咩係Baby Loves Disco
係專為12歲以下小朋友而設的社交活動，於04年在美國首先開辦，由於現時的家庭多是獨生子女，缺乏群體相處的機會，而Baby Loves Disco 就可讓小朋友聚在一起跳舞及玩耍，因而活動甚受家長歡迎，其後更推廣至歐洲、日本等地。今年6月，香港人Norman 及太太CoCo 引入Baby Loves Disco 到香港，並於中環Dragon-i舉行首次活動，反應熱烈。CoCo 說：「估唔到第一次活動已經超出預期參加人數。可能這個活動在香港較少有，idea 較新穎，所以好多家長想帶小朋友嚟玩。活動中我哋除了帶領小朋友一齊跳舞外，仲有跳舞比賽，小朋友可以自創舞步參加，好多小朋友都玩得好投入。而我哋以後每個月都會舉辦活動。」
Baby Loves Disco
下次舉辦日期：12月中（待定）
主題：聖誕派對
時間：3小時
地點：待定
對象：0-12歲小朋友及其家長
入場費：小童$120（0至12歲）、成人$200。
另設家庭套票$500（2成人和1小童）、及$600（2成人和2小童）。費用包飲品及小食。
網址：
http://www.babylovesdisco.com.hk
查詢：51338424
