本週一，周麗淇雖然著住大紅戲服，但依然木無表情，被問陳總叫食飯一事，更直奔錄影廠以免再惹麻煩。
被踢爆瞞住周麗淇（Niki ）偷嗒佘詩曼後，鄭嘉穎被網民封為新一代賤男，有指他為保住乖仔形象，向Niki 狂發短訊箍煲。
為免愛將形象繼續插水，高層樂易玲亦即時出招，在中秋節當日，玩殘Niki 的女助手還以顏色，又部署將鄭嘉穎、佘詩曼塑造成情侶檔賺錢，力撐到底。
強權舉動卻驚動老闆娘方逸華，為免愈搞愈多事，陳志雲已接令，充當戀愛顧問介入調停，安排鄭嘉穎與Niki 見面講清楚。
年屆五十的樂易玲保養得宜，今年港姐決賽當晚不單以透視裝示人，06年在鄭嘉穎的迷你個唱，更忍唔住向對方送吻，行為舉止，有別於一般公司高層。
周麗淇的助手阿Ju （右）被玩，好多人都睇唔過眼，不過近日心情跌至谷底的Niki 就仍然唔敢出聲，以免愈搞愈多事。（《蘋果日報》圖片）
陳志雲接令插手「情變事件」，據知都是六嬸意思，故此陳總亦不敢怠慢，私下替二人度期見面，希望事件不要繼續鬧大。
先有跟王喜合作傳出不和，繼有偷食事件，本來有乖仔稱號的鄭嘉穎形象蕩然無存，難怪樂易玲要出招救亡。
問到Niki 甩拖一事，身為家姐的周汶錡含糊表示：「佢無嘢囉……佢好開心，我都好開心。」咁即係大家都知咩一回事。
搵人開刀
契仔鄭嘉穎搭上阿佘後，樂易玲幫口澄清二人戀情的同時，另一方面，她認為終日苦口苦面的周麗淇，是有意在傳媒前扮可憐，打擊鄭嘉穎形象，為免愛將受拖累，她開始做嘢反擊。
據知，在中秋節當日，就先搵Niki 的女助手開刀。
「嗰日Niki 女助手好似平日咁返電視城開工，不過守門口嘅保安就話樂小姐落咗order ，佢冇工作證，唔可以入去，其實所有助手都冇工作證，得佢一個咁俾人對待，Niki 當時即刻打電話搵梁家樹幫手，不過無論監製點講，樂小姐都唔肯俾Niki 個助手入去開工，咁監製唯有搵陳生（志雲），陳生再打電話同樂小姐交涉，話大時大節，俾一次機會人哋，唔好搞到人哋遲收工，佢先肯放人一馬。」工作人員說。
志雲插手
以為就此可以了事，豈料樂易玲咬住對方唔放。女助手翌日返電視城開工，再遭留難，最後再由陳志雲出面拆掂。
「門口保安同女助手講，話樂小姐講明，嗰日因為中秋節，所以先俾佢入去，仲講明只係一次，如果女助手再入去開工，就要依正手續申請工作證，Niki 見到咁嘅情況，明知自己俾人玩，即時喊到收唔到聲。後來搞到去陳生嗰度，件事先拆得掂。依家Niki 女助手每次入嚟（電視城）都要申請一次工作證，即係逐次申請，大家都知樂小姐錫嘉穎，不過就覺得佢唔需要咁樣整Niki ，公報私仇。」工作人員說。
擺和頭酒
樂易玲的過激舉動不單令同事嘩然，據知亦驚動了方逸華。為免將事情鬧大，影響士氣及工作進度，老闆娘即時落令陳志雲插手處理。
「陳生一直想安排嘉穎同Niki 坐低食番餐飯，等佢哋兩個可以傾吓，唔好令局面咁僵，加上佢兩個為咗呢件事，都無法集中精神拍戲，陳生上星期一直都同佢哋度期，不過《烈火》又over ，《桌球天王》又趕埋尾，佢自己又要去冰島拍特輯，所以都未夾到時間。」知情者說。
本週一（九月二十二日），周麗淇返電視城埋位拍《桌球天王》，沒有女助手同行的她獨自入廠，被問到陳生做和事老安排她跟鄭嘉穎見面一事，堅持封嘴的Niki 說：「我冇嘢講，多謝大家關心。」
（《蘋果日報》圖片）
羅傑承
周麗淇近日在《桌球天王》中夥拍鄭少秋及鄧健泓演出，據知是由陳志雲及BMA 老闆羅傑承穿針引線安排她演出，Niki 並非如外間所傳揀人合作。
（《蘋果日報》圖片）
無線在本週播出由鄭嘉穎及郭晉安主演的劇集《與敵同行》，高層樂易玲為免嘉穎的「賤男」形象令收視插水，不惜插手干預其感情事。
佘詩曼與鄭嘉穎在○六年雙雙榮登視帝、視后，當時嘉穎更吻賀贏得兩個大獎的阿佘。
