察覺BB 大便時很用力以至滿臉通紅，媽咪都會很擔心。但醫生指出這是正常的，BB 排便就要用力。只要糞便是軟身的，便不屬便秘問題。
馮姑娘的朋友何太，見半歲大兒子有幾日屙唔出大便，以為是奶粉的問題，於是換了奶粉。3日後BB 大便仍很少，便再換奶粉，結果半個月換了三次奶粉。「但情況反而嚴重咗！佢排便要好用力、好辛苦，我見到都心痛，咪搵手指幫佢挖肛門，點知反而整損咗流血。究竟點先幫到佢﹖」等馮姑娘搵好友譚一翔醫生幫下手。
譚一翔醫生指，處理BB 便秘應先從改善飲食入手，然後才會使用潤滑劑、吸水劑和口服乳果醣等方法。
醫生：無大便≠便秘
兒科醫生譚一翔聽完何太囝囝的情況，就話佢自已都試過幫囡囡挖肛門來通便。他說：「我大女今年27歲，佢細個時我都試過撩佢肛門。當時我同好多家長一樣，以為BB 無大便就梗係便秘，咪焦急起來。但做了兒科醫生就知道，BB 數日才排便一次、大便不暢順、大便中有粒粒、糞便顏色較深或呈綠色、大便好臭或有酸味，甚至幾日唔排便，全部都唔算係便秘。只要最終排出嘅大便係軟身的，就算係正常。
「人人都知餵母乳較健康，但我見過有食母乳的BB 最耐18天無大便，原因係母乳易被腸胃全部吸收。最後BB 終於排出軟身糞便，這便不算是便秘。」
BB 的大便呈糊狀（上）或牙膏狀（下），亦不表示有便秘問題。
換奶粉非解決良方
譚醫生又提醒家長，更換奶粉對促進BB 排便並無幫助：「現時的奶粉，營養成分都經過國際衛生組織規定。當中的乳清蛋白，例如母乳成分中嘅Alpha 蛋白，屬水溶性蛋白，更容易被BB 腸胃吸收消化，故糞便會較軟，而不同牌子的奶粉根本分別不大。媽咪應該先了解甚麼是便秘，並注意9個要點就可預防BB 便秘。」
便秘大解構
定義︰糞便乾硬呈丸狀，如波子或彈珠；排便時導致BB 大哭、腹痛、腹脹或肛裂。
預防9招︰
1）不應常轉換奶粉。
2）勿把盛滿奶粉的量匙擠壓，令奶水過濃。
3）3、4個月大嘅BB 每天除了飲奶，還要飲4至8安士水，可加入小量葡萄糖，有助水分吸收。6個月大或以上嘅BB ，可喝蔬果汁及西梅汁。
4）1歲以上嬰兒，可在稀飯中混入蔬菜或紅蘿蔔。
5）沿肚臍周圍以順時針打圈方式替BB 按摩。
6）用棉花棒在BB 肛門處以打圈方式按摩。
7）每天替BB 洗澡時輕搓其胃部或肛門。
8）BB 平躺時，前後拉動其雙腿，做出如踩單車的動作，有助排便。
9）若有任何異樣，應找醫生處理，千萬別自行幫BB 排便。
