CK Lo 23歲
K2Event 娛樂公司老闆
好多十幾歲嘅年輕人，成日覺得社會冇畀機會佢哋發揮，但我希望佢哋反省一下，究竟自己做咗幾多功課，令到個社會畀機會你去發揮先？好似我屋村出身，讀書成績又麻麻，但起碼夠樂觀同勤力，中五畢業後做兼職，一路儲錢到20歲開娛樂事業公司，做agent 幫婚禮、酒店同商場show 搵表演者，年中無休係好辛苦，因為我有準備，所以呢個社會有畀到機會我show 吓自己嘅實力。
我自細已經準備做生意，因為鄰居係糖果入貨商，中三就識得同佢嗱貨，喺學校賣軟糖，同小食部爭生意，第一次「創業」搵到幾百蚊外快，不知幾開心！雖然盤生意因被學校警告要記缺點而「結業」，但體會到做老闆係咁有滿足感，亦知道第時畢咗業唔係只有打工一條路可以揀，原來都可以搞生意，呢個對成績麻麻嘅我嚟講係一條生路！由過日起，我就同自己講讀唔成書唔緊要，但要靠自己努力儲錢去建立自己嘅事業。
CK （右）與YK ，兩個由細玩到大嘅屋村仔，初中一起織起創業夢，至今合資一間娛樂公司。
為儲錢3日唔
考完個會考就
臨出嚟搵嘢做，走咗去商場做兼職扮公仔、做小丑，雖然每次收入每個鐘只得30至40蚊，但要達到儲錢創業呢個目標，最高紀錄試過3日冇
過，屋企人都戥我辛苦，我知道幾辛苦都要頂硬上，反而愈做愈有heart ，因為工作時間排到密晒，即係冇浪費到時間，代表目標愈嚟愈近，一諗起就嚟可以做老闆就好興奮！
商場表演除咗儲到錢，仲識到好多商場嘅聯絡人同表演者，我就利用呢啲contact ，喺04年同朋友夾錢兼向青協申請貸款，加埋用咗10萬蚊開咗間娛樂公司，專幫大小公司籌辦商場表演、私人派對及商品宣傳等活動，會安排啲表演者出show ，從中抽佣。目前我替超過130位魔術師、婚紗攝影師、小丑等表演者安排工作，公司每月平均有約3萬蚊收入，同拍檔平分，我自己扣除咗生活開支，有錢剩就會買公司器材。
有能力搞大show
原來做老闆唔使落場表演壓力仲大，因為以前自己表演完就走得，但而家統籌一個show ，好考合作性同應變能力。試過有位魔術師臨時甩底，我要臨急搵另一位頂替，但佢趕唔切嚟會場，好彩我喺讀書時學過變絲巾嘅小魔術，上台搞吓氣氛等位魔術師嚟，咁就畀我過骨，但都驚到一額汗！又好似上年同SCEH 合作，要喺「亞洲遊戲展」搵200個promoter ，半年前我就要寫好計劃書、請人規模同面試條件等，結果個show 好成功，畀我學識點樣去搞大型event 同招聘，亦畀我知道只要做足功課同準備，幾難嘅嘢自己都可以勝任。
暫時我唔算好成功，但起碼自食其力，想趁中五放榜，同班畢業生分享一下！升唔到學唔緊要，有得捱就代表有機會，由低做起有乜問題？
