風雨不改一月一日《叱吒》頒獎禮散band ，卻餘波未了。
打正公平旗號的商台，今年撞正《叱吒》廿周年，大搞歷史回顧，場刊亦列明《叱吒》過往10年各獎項得獎名單。
偏偏掛萬漏一，獨無時裝界潮人，兼得過兩年作詞人大獎的Wyman 黃偉文。得獎歷史除名，據知Wyman 私下扯火，而身為場刊總編輯的林海峰，事後急補鑊，對記者說：「可以話係睇漏眼嘅……應該係印刷上問題！」
08年1月1日，樂壇總動員出席商台《叱吒樂壇流行榜頒獎典禮》，現場有聲有色，台上嗱獎人人開心，台下卻因一本場刊，掀起是非。
有你冇我
今年場刊由多位DJ 負責，而林海峰則為總編輯。據知十年回顧的得獎資料由商台DJWasabi （鄺兆昌）負責，記低每年30多個獎項，而Wasabi 在商台工作多年，對各獎項名單理應絕不陌生。的確，場刊內各得獎人名字都一字排開，惟獨04和05年Wyman 實至名歸兼打低林夕的「CASH 填詞人大獎」，連影都冇。
「呢part 由Wasabi 負責，佢一向都好崇拜林夕㗎啦，林夕嗱啲佢一定記得，嗰2年Wyman 贏咗林夕嘛，加上Wasabi 一直唔鍾意Wyman ，咪唔落Wyman 個名囉！」知情者說。
護主
極度崇拜林夕嘅商台DJ Wasabi （鄺兆昌）（右），經常陪林夕出入。今次「疏忽」咗喎，人為定意外先？
惹火場刊
04、05年兩屆Wyman 明明嗱填詞人大獎，場刊連名都冇，06年回復正常有名，不過係林夕個名囉！
認睇漏眼
場刊出版後，由於字數太細太密，未有太多人留意到04和05年的填詞人大獎被抽起。近年已減產的Wyman 當日更未有出席頒獎禮，不過據知他事後得悉在場刊內除名後，曾私下埋怨「有人真係好唔鍾意我囉！」以示不滿。
上週四晚，記者帶埋場刊當面向Wyman 問回應，淡定有錢剩的Wyman 不但沒有發火，更笑住口話唔介意。「歷史嘅嘢，唔係話教科書咁，話刪就刪，我自己知咪得囉！榮譽同尊重嘅嘢，要畀你就總有辦法畀你，我唔在乎一張紙！（好唔抵啫，登漏兩屆喎。）好多謝個個戥我唔抵嘅人啦，我當事人真係冇乜所謂。（係Wasabi 專登唔落你個名喎！）冇所謂。（林海峰係場刊總編輯，要唔要負責？）咁呢啲咪叫careless mistake 囉！」
至於林狗則沒有多加解釋，只說是印刷上問題，不過即將開騷的林狗亦不失幽默：「如果我哋要專登抽咗Wyman 個名出嚟唔登，仲難啦！（Wyman 話呢個係careless mistake 喎！）我會話係印刷上嘅問題，亦可以好似你所講嘅careless mistake ，或者係睇漏眼嘅！」
Wyman 有容乃大。Careless mistake 真係唔care 囉！
愛恨分明
Wyman91年中大社工系畢業後，即入商台開咪，成為當紅DJ ，不過97年有傳Wyman 與俞琤反目之後，相隔7年Wyman 至肯返去做了3個月節目，仲要係當時的二台總監甘菁菁開到口至成功。Wyman 曾在訪問透露，話由離開商台嗰一日開始，就冇再同俞琤講過一句說話，除咗02年響叱吒頒獎禮上同俞琤互相講咗句「新年快樂」之外。
Wyman 講嘢句句精，近年接受訪問時，提起與商台或俞琤關係，都耐人尋味喎！
講關係
俞琤鍾意用十二個字去講嘢，我嘅十二個字係以前同佢係不歡而散、而家係煙消雲散，十二月廿四號（04年重返商台主持3個月《八十大壽》的最後一日）係見好就散。04年9月
說反面
你問我記唔記得（當年與俞琤反面），我記得！但介唔介意，我已經唔介意，如果再講就係我仲介意，我覺得冇必要再拆開舊傷口！04年9月
話回巢
商台工作唔夠開心，返工又underpaid ，心諗我要走你先識挽留我，而家『我唔要呀！』，於是拒絕（回巢），擺明為啖氣！06年6月
係睇漏眼嘅！真實對白
身為《叱吒》頒獎禮場刊總編輯，林狗面對記者提問時，細心再查閱一番錯處再加以解釋，抵讚！不過下次小心啲啦！
多謝個個戥我唔抵！真實對白
Wyman 近年埋手寫時裝專欄兼enjoy life ，已減產填詞嘅佢，據知初時對場刊錯漏都幾唔高興。
上週四，Wyman 見到《叱吒》場刊已下火：「多謝個個戥我唔抵喎，我真係冇所謂囉！」
《忽然1周》圖片
